Ĝis nun kolektiĝis jam naŭ prelegoj, seminarioj kaj aliaj prezentoj por la 1-a Internacia Kongreso en Strasburgo, kiu okazos de la 6-a ĝis la 13-a de aŭgusto 2010 (vendredo ĝis vendredo). Superrigardo pri la programo videblas ĉe http://www.esperantoland.org/internacia_kongreso/#programo .
La kongreso rapide atingis internacian partoprenantaron: La ĝisnunaj aliĝoj venas el Nederlando, Belgio, Germanio, Italio kaj Usono. Ankaŭ homoj el aliaj landoj montris jam intereson. La nomoj de kelkaj unuaj aliĝintoj legeblas sur http://www.esperantoland.org/internacia_kongreso/partoprenantoj_ik1.php
Organizanto de la 1-a Internacia Kongreso estas la asocio EsperantoLand, kiu dum la pasinta jardeko survojigis la renkontiĝojn SOMERE kaj Novjara Renkontiĝo (NR). Entute la asocio organizis jam pli ol dudek semajnojn de Esperanto-renkontiĝoj. Lastatempe aldoniĝis la Novjara Internacia Semajno (NIS) kaj PRINTEMPE.
La nuna aliĝperiodo por la Internacia Kongreso finiĝos en la 10-a de junio.
Plezuran printempon - kaj eble ĝis revido dum SOMERE, Internacia Kongreso aŭ en alia renkontiĝo de EsperantoLand
Lu Wunsch-Rolshoven